تفكير ماقبل النوم

تحديث

مبررررروك لووووولى يابت يا تغريد خلالاص مفيش بقى دموع القمر الف مبروك ياحبيبتى وربنا يتمم لك على خير والف الف الف مبرررررووووووووك




انا بفكر اذا انا موجود نادرا لما بفكر امتى بقى? وانا بنام ازاى ؟ معرفش! مبقتش اعرف انام الا لما افكر
نادرا لما بفكر من يومين كده جه فى بقالى شوية اسأله
هى قضية سوزان تميم سكتوا عنها ليه؟
طب ولا اكيد هشام هيطلع منها والسكرى خروف العيد

عملنا جروب على الفتيس بوك ياسحس عشان الجزائر طب وبعدين
الناس كانت بتهتف وحسينا بقيمة مصر ياجودعان واد ايه مصر دى امى وخالتى ها ايه اللى حصل يعنى ليه برضه الحكاية سكتت
ولا احنا بتوع اللحظة

اكتر حاجة ضحكتنى الاسبوع اللى فات خبر قريته

( دفاع "هيفاء" يطالب بلجنة يرأسها حواس للتأكد من وجود قرود فى النوبة
وخلال الجلسة دفع محامى هيفاء وهبى بعدم اختصاص القضاء المستعجل نوعياً بنظر الدعوى. وطالب بندب لجنة من الخبراء على أن تضم د. زاهى حواس نائب وزير الثقافة، الأمين العام للمجلس الأعلى للآثار، وأساتذة من قسم الجغرافيا فى جامعة

القاهرة، وأحد اساتذة علم الحيوان، للانتقال إلى النوبة وإجراء البحث اللازم للتأكد من
وجود بعض الحيوانات فى النوبة منها القرود.) ماهو مش اى حد دى الست هيفاء ياعالم يعنى الواوا



بطرس غالى فى تصريح له(غالى: الرئيس وأسرته أول من قدم إقرار «الضريبة العقارية».. والوزراء لم يطلبوا إعفاءهم)
اظرف تصريح ولا كلامك عن المرونة فى الضرائب خلتنى اغير فكرتى تماما عن مصطلح المرونة ال هو ايه بصحيح معنى مرونة؟؟؟؟؟

يسرى الجمل ؟ ميييييييييين ده ؟ مييييييين ده الوزير بتاع التعليم
تعليم مييييييييييييييين؟

طب تعرف الجمل؟ ااه اللى بيركبوه عند الهرم وبياكلو لحمه اللى مش بيستوى



مركز «حماية الدواء»: الشركات العالمية تجرى تجارب أدوية غير قانونية على

المصريين ياااااااااه احنا رخاص اوى كده وبقينا فئران تجارب طب ليه ولمصلحة مين؟

أوضح أن تلك الشركات تستغل التجمعات الطلابية، والجمعيات الطبية حسبى الله ونعم الوكيل

جت فترة وبقول بيرغوا فى حكاية الانتخابات ومين يجى ومين يروح و مين ينفع ومين
لاء والاعلام اشتغل وعمرو اديب يهتف

ولا للتوريث وشوية يقولوا ماهو مفيش حد احسن منه ده مخطط للحزب وانجازات
الحزب وبقدرة قادر مصر كلها بملايين المواطنين مفيش راجل ينفع رئيس يا سلام حكمتك يارب

وسكتت الحكاية قالوا اصل لسة بدرى دى فاضل عليها سنة
امال هنتحرك امتى وياترى مين اللى هينتخب نفسه برضه هيسكتونا بمسرحية ابو طربوش !!!!!!

وله فى خلقه شؤون



بحس ان حياتنا زى القطر والناس بتدخل حياتنا لما القطر بيقف فى المحطات ناس حلوة

او وحشة فى ناس بتنزل فى محطات قريبة وفى ناس بتفضل لاخر الخط بس احنا

منعرفش القطر هيقف امتى؟ فى انهو محطة يارب ميطلعش ادام قطرى جاموسة تبقى حوسة


واخيرا وليس اخرا انا بحب العيش الفينو مع الحلاوة
محدش يجيلى بعيش عربى انا بقول من دلوقتى وده جزاء اللى يفكر قبل ماينام ومتقل فى العشا




الطلب بقى وختامها مسك

اه على فكره انا اول مرة اشترك فى منتدى وليا الشرف ان اول منتدى يكون لاخونا المدون ادم المصرى
صاحب مدونة مملكة زمن الفن الجميل عمل منتدى رائع اسمه((((((( حنيه ))))) http://www.7nea.com\
ياريت كلنا نشارك فيه بمواضيعنا ونستفاد منه لاننا كلنا اسرة هنا وهناك

وفعلا كلنا اخوات ودى احلى حاجة فينا اننا بنكون مع بعض وبنساند بعض اتمنى اشوف مشاركتكم معانا
وبلاش تكسوفى ادامه عشان اللى هيدخل هيتعلم عندى ها وانتوا عارفنى قوية ومفترية

يلا جه دلوقتى بس هقدر انام

كنت معكم من تحت السرير (مى ام العافية)

ااااااااااه يانى ياغلبانة

يوم غريب من اوله ااااااااه يانى ياغلبانة يا طيبة يااانى بصراحة نفسى ارغى على
قلبوكوا شوية واحكى لكوا على اللى حصلى اهىء اهىء

قلت لنفسى الصبح نبدا يوم التنضيف العالمى حضرت العدة المنفضة والممسحة

ومكنستى اللى بتحسسنى انى عاملة زى الساحرة سونيا وجروفى المعتاد وربطت

الايشارب عملته مدورة وشمرت عن ساعدى كنت شبه البت سوكا اللى كانت فى فيلم ابو على وفى عز معمعتى فى حرب التنضيف الباب خبط

قلت لالالالالالالالا مين التنح ابن الذين اللى بيخبط رحت تسلحت بالمكنسة والجاروف وفتحت وانا عينى بتطلع شرارة

ابص الاقى الولا ابن البواب بيبصلى
واتخض وبدا بالتلعثم اااااااااااااااااااابلة مىىىىىىىىىىىىى بوكية الورد ده جايلكوا

بصيتله وانا مغمضة نص عين هو انت يامنيل ده انت يومك مش معدى ده انا هقضى على طفولتلك البريئة

فين العيش يا بن............ ومسكته من الفانلة وعلقته ورحت رمياه تانى وبقيت
اصقف على وشه الولا اتسررع حاضر يا ابله

والنبى خلاص حاضر والنبى ابوس ايديكى يا ابله
انا-خلالالالالالالالالاص امشى انجر تعالى هنا يازفت ورد ايه ده اللى جايلنا مش احنا ياباباااااااااااااااا اللى يجيلنا ورد

لا والله ابويا قال بتاعكوا وهرب الولالالالالالالالالا بعد شلوت محترم

رحت رازعة الباب ققققققققطيييييييييعة سرحت كده وطفح على عقلى فيلم عمر وسلمى ممممم

اصل البوكية كان تحفة بجد

رحت طالعة البلكونة وانا بشحتف بشبشبى ابو وردة وابص وامعن النظر يمكن معجب

ولا حاجة وقال بقى دى رحيق الورد لقيت واحد ماشاء الله ياخرابىىىى مز مز واقف بعربية فظيييييييعة

قلت يابركة دعا بابا والدنيا بتمطر انا بحب الشتا عشان كده الدعا ساعة المطرة

ياحلولى انا عايزة من ده ياحزومبل وابصله كان ناقص اصفرله بس سبلت عااتىىىىىىىىى

والولا يبصلى وكأنه قرفان وخايف ااااااااااااااخ انا نسيت انا طالعة بالمكنسة والمدورة

يادوب الحق البس الاقى ايييييييييييييييه مزة نازلة وتركب معاه ويمشوا

اهىء اهىء ونظرة حسرة ولسانى وقف وكنت عايزة ارزع البت بالشبشب واقولها

لالالالالالالالالا بقى ياحرمياية ده بتاعى ماليش دعوة مش لاعبة عاااااااااااااااااااااااااااااا

وانا بدبدب فى الارض الاقى كارت وقع اتااااارى جاى لاخويا رحت داخلة عليه قوم اصحالىىىىى

اخويا قام اييييييه البيت وقع ؟ ايه الورد ده؟

بصيتله بتوعد ده له. ليك انت عااااااااااااااااااااااااااااا

اقال ايه عشان كان عيان باعتين الورد ياسلالالالالالالالام ده انا بفرفر زى الكتكوت الجربان محدش بيعبرنى بواحد بيمبو حتى!!!!!!

بصتله من فوق لتحت وقلتله
اولا كانوا بعتوا حاجة تتاكل ال ورد ال ناس فاضية ورايقة

مصمصت فى شفااااايفى حكككككككككككككم

بصيت لبوكية الورد قلت ال رحيق ال محدش يقوووولى رحيق قولوا شم بصل تقلية تووووم

عااااااااااااااااا يعنى لو كان اتبعتلى وكان الحليوة ده اللى بعته يلا حظووووووووووووظ

وعلى راى المثل جاتها نيلة اللى عايزة الخلف

نسيت اقولكوا وانا بشم الرحيق ههههههههههه شميت ريحة الشياط وسلملى على الرحيق
واحب اسمع سيدى وصالك

تانى موقف

بليل طبعا كالعادة كنت قاعدة ادام الكمبيوتر متنحة برضه كالعادة فاتحة بوئى بطريقة

بلهاء و عينى مبقلظة بالنضارة اللى قربت تلعن اليوم اللى لبستها فيه

كنت حاسة انى بتحول وبقيت شبه انسان الغاب طويل الناب هتحول وابقى شبه
الدنداصور

الاقيلكم اييييييييييييييييييه جرس التلفون بيرن طب مفييش حد فى البيت غيرى واختى

كانت نايمة وانا دايما مش برد عشان بنكر نفسى نيهااااااااااااا

قلت مابدهاش بقى وقمت رديت لقيت البت صحبتى اللى ربنا كارمنى بيها من ايام الكلية

هى- مى ازيك عااااااااااااااا انا مخنوقه وتعبانة
انا- تووووتة كيفك اشلونك مالك يامنيله خير
هى- بيبو فرقع جيجى عااااااااااااااا
انا- يانهار جانجاه كاروهات صوف
هى – ماتيجى ننزل مخنوقة عااااااااا
انا- سددددد الساعة 6 يامنيلة ممممممم طب يلا مع ان بقالى اكتر من شهرين مخرجتش

ولا اعرف شكل الشارع والله بتوحشينى انتى والشارع

ثوانى والبس هستناكى على المحطة بس متتاخريش لحسن انا كتير يطمعوا فيا
هى- ممكن تتنيلى ويلالالالالالالا

انا –قفلت فى وشها

صحيت البت اختى فجعتها ههههههههههه قلتلها انا هنزل اختى قامت زغردت مستتتتتتتحيل

بجد يااه بجد اخيرا ياحبيبتى هنرتاااا وقبل ماتكملها قلتلها بتقولى اييييييييييييه؟ قالتلى لالالالالالالا ابدا
يعنى تشوفى الشارع حتى بدل منظرك ده

المهم لبست واتشيكت وحطيت البربرق ونزلت بس وانا نازلة سمعت حاجة بتتكسر

باين قولة اتحدفت معرفش الناس بقت تحدف قلل ليه؟ والزفته اتاخرت كالعادة هزأتها شوية واتمشينا الواحد كان فرحان من زمان مشافش ناس

يااه الدنيا اتغيرت ياجووووووودعان وانا حابسة نفسى لالالالالالالا لاينكن ايدااااا
والبت شغالة سحححححح

قلتلها اتنيلى يامنيلة على شبابك الغض ايه اللى حصل جتك وكسة

قالتلى انتهت قصة حبى (ال يعنى والنبى دى هبلة) قالى انى غبية !

انا مقدرتش امسك نفسى ههههههههه الراجل ماغلطتش بصراحة بس ده معندوش ذوق

ازاى يقولهالك فى وشك نوووووووو امبوسيبل جلياط اوى مش جنتل خالص

هى-لالالالالالا بعتهالى فى مسدج رحت قايللها نونونونونو ده رمة بالاوى سورى يعنى هو عشان بيستغل عرض الرسايل بتاع فودافون اه لو كنتى عطتيته

بالزربووووووووو كان مشى عدل
وعلى راى المثل ربى ياخايبة للغايبة بلا وكسة

نسيت واحنا فى الكافية كان فيه مشروب اسمه رضعة الاسد!!!!!!!!!بصينا لبعض

وتنحنا قلتلها يلا نقوم بسرررعة انا اتفطمت من زمان
قالتلى طب نشرب فيروز قلتلها يلا نشرب عشان ننسى بس بلاش بيريل احنا مش ناقصين نسترجل اكتر من كده

قعدنا نضحك وفاتحين بؤنا لدرجة اللى يبص يشوف البلعوم والمصيبة مش عارفين بنضحك على ايه!

انا وهى مكناش عايزين نروح الهبل سيطر علينا بدرجة كبيرة وشوية وهقول اناااااااا جدع

هى كل مرة تسألنى نفس السؤال بقالها كذا سنة وكان ردى عليها واحد

مى طب هنعمل ايييييييييييييييه؟

انا – انا عايزة اشترى برتقان عشان اعمل كيكة

هى : تصدقى انك غلسة وتنحة وبارده وانا غلطانة انى خرجت معاكى
انا - احسن برضه بقولك معادنا يوم الخميس ؟
هى اه ماشى قبل ما انزل هرنلك اوعى تفتحى عليا



بس كفاية عليكوا كده المهم عرفتوا حكمة العدد ان الدنيا دى غدارة والقطنة مابتكدبش وصباح التهييييييييييس
احييكم من امام الشاشة كان معكم عمتكم مى

A walk to Remenber

يرن جرس الباب اكثر من مرة لغاية ما اللى بيخبط على الباي خبط بايديه تفتح عينيها

من النوم بإمتعاض شديد وتقوم من النوم بسرعة وتجرى تفتح الباب تلاقى البواب

جايب لها حاجات كانت طالباها ومن ضمنها بوكية ورد

خدت الحاجات حطتها فى المطبخ وحطت بوكية الورد فى فازة

تقف دقيقة كده لسة مش مستوعبة انها صحت تفرك فى عينيها وتقنع نفسها انها لازم

تبقى جميلة اليوم ده بالذات زى كل سنة وتروح مبتسمة ابتسامة امل وتفاؤل

تدخل الحمام وتحضر حمام دافىء بدأت تحس بالمياه الدافية وهى بتخترق شعرها لجلدها

وكأنها بتطبطب عليها كانت زى الطفلة بتلعب فى المياه وغمضت عينيها واختلطت

دموعها بالمياه لدرجة انها ممكن تكون ادفىء من المياه بقت عايزة الدنيا تقف عند

اللحظة دى يااه دى اتأخرت اوى قامت وكأنها مدفونة فى المياه ميته وصحت لبست الروب ومرضتش تنشف شعرها حبت تسيبه مبلول

بصت لنفسها فى المراية يااه عجبها شكلها اوى وكانه وحشها عجبها لون شعرها

الجديد لايق على بشرتها البيضاء بدأت تشوف عينيها وكأنها لأول مرة

حبت شعرها المبلول لما تمشى وشعرها بينقط مع كل خطوة ليها وبرضه مكانتش

عايزة تربطه كانت عايزة تتحرر من اى قيود راحت على اوضتها لاحظت انه يوم مغيم
وبتمطر اوى فرحت زى الاطفال وجرت على الشباك بسرعة راح اطلقت هواء الزفير
على الزجاج

وراحت راسمة قلب وسهمين كتبت اول حروف اسمها واسمه

سرحت اصله يوم غير عادى يوم مميز جدا عندها يوم لتالت سنة بتحتفل بيه لوحدها

افتكرت ايامها معاه افتكرت لما كان بيصحيها افتكرت انها مش بتسمع صوت حد غيره

فى اليوم ده افتكرت عينيه ولمسته افتكرت انه يوم عيد ميلاده وكانه ميلادها هى

انتبهت على صوت موبايلها بصت عليه وقفلته خالص.

كانت عايزة تعيش معاه بس اليوم ده اليوم هو سيدها وهى جاريته كانت محتاجة هدوء

تام كانت محتاجة تعيش مع نفسها ومعاه ومع ذكرياتهم قعدت على كرسيها المفضل

بجانب المدفأة وشغلت اغنيتها المفضلة ل( Mandy Moore (cry)

كانوا دايما بيسمعوها مع بعض فى فيلمهم المفضل
A walk to remember قعدت تغنى مع الاغنية I'll always remember It was late afternoon It lasted forever And ended too soon You were all by yourself
Staring up at a dark gray sky
I was changed In places no one would find
All your feelings so deep inside (deep inside)
It was then that I realized That forever was in your eyes
The moment I saw you cry The moment that I saw you cry
It was late in september And I've seen you before (and you were)
You were always the cold one But i was never that sure
You were all by yourself Staring at a dark gray sky
I was changed In places no one would find All
your feelings so deep inside (deep inside)
It was then that I realized
That forever was in your eyes The moment I saw you cry
I wanted to hold you i wanted to make it go away
I wanted to know you I wanted to make your everything,
all right.... I'll always remember... It was late afternoon..
. In places no one would find... In places no one would find All your feelings
so deep inside (deep inside)
It was then that I realized That forever was in your eyes
The moment I saw you cry



مسكت مج القهوة الدافى وكانها بتستنجد بدفأ المج ورجعت راسها لورا ياااه اد ايه

مفتقداه كان واحشها اوى كان نفسها تلمس ايديه ولو مرة ومتشفهوش تانى

لقت نفسها بتستطعم دموعها مع القهوة وكان نفسها تكون جريئة ولتالت مرة فى حياتها

جابت علبة السجاير وشربت سيجارة اصل عيد ميلاده وكان واعده نفسها فى كل عيد تولع سيجارة





كانت بتطلع دخان السيجارة وكـانه اخر نفس فى حياتها وكانت بتخرج انفاسها على

شكل حلقات متتالية وهى ترى فى هذه الحلقات ذكرياتها لغاية ما انتهت السيجارة مثل

اى شىء به لذة مؤقته انتهت المتعة بس للاسف هى لسة منتهتش كان عندها امل واحد

فى الميه انه يخبط عليها اليوم ده زى كل سنة بتحسب ده وبرضه بتدى لنفسها امل

قامت واختارت اشيك فستان عندها فستان يبرز ملامح انوثتها التى تبرزها فى هذا اليوم

فقط كانت فرحانه كطفل فرحان بلبس العيد بصت لنفسها لقت عينيها بتلمع وحطت
عطرها المفضل ولبست حذاء بكعب عالى

وبصت لنفسها لقت نفسها اد ايه جميلة اوى مشافتش نفسها من زمان كده لبست
خاتمها

وساعتها. ياااااه دى الساعة بقت 9 بليل قالت لنفسها هو الوقت بيجرى بسرعة ليه

كده؟ راحت جرى عالمطبخ وحضرت السفرة وحطت التورتة وبوكيه الورد وحطت

الشمعة فى التورتة وطفت كل الانوار وقربت من الشمعة اوى واتصلت بيه رد هو: الو
الو الو الو

راحت حاطة ايديها على السماعة عشان ميسمعش وقالتله كل سنة وانت طيب ياحبيبى

عقبال مليون سنة و اتقفلت السكة

وهى بتدمع راحت دموعها نزلت على الشمعة طفتها

ولسة الاغنية شغالة

ياحلوووووولى تاج

اولا احب اشكر اللى اهدونى التاج

اجمل اختين ليا (ميرو و ياسمين) ميرسى ليكوا كتيررررر

كان نفسى فى تاج بصراحة ربنا عطانى اتنين وفى اسبوع واحد هههههههههه

يلا استعنا على الشقا بالله

اسمك؟

مى


سنك؟ 

وليه الاحراج ده ههههههههه عالعموم  مش بكسف عادى

هما 4 سنين طب خلاص بلاش  فشر  لسة مكملة 24 طازة

اسم مدونتك؟

رحيق الورد


مجال دراستك؟

اداب لغة عربية ولغات  شرقية ودبلومة تربوى

وناوية على الماجستير  ربنا يدينا  طول العمر.




هل فكرت فى اغلاق مدونتك  والسبب؟

لا لالالا ممكن اخد اجازة منها لكن  مش

هلغيها  الا

فى حالة واحدة بس ومش هقول ايه هى  نيهاااااااا



ايه رد فعلك لو حد قل أدبه عليك فى المدونة ؟

مفيش حد بصراحة  بيضايقنى  مهما كان رأيه معايا

او ضدى بس طبعا لو  قل ادبه عليا مفيش اسهل من مسح التعليق

أسوأ مدونة  دخلتها ؟

مدونة واحدة مثلية


هيحصل ايه لايميلك بعد ماتموت؟

مش هبقى مهتمية  انا هكون فى ايه ولا ايه ههههههههه


اديت الباس وورد لحد قبل كده ؟

ايووووووون


السفر بالنسبة لك ايه؟

طبعا متعة وحلم اتمنى  انه يتحقق لانى اخر مرة

سافرت فيها كانت من  سنين ولمناسبة معينة


المود بتاعك؟

كوكتيل احاسيس


بتعمل ايه فى وقت فراغك؟

بعشق القراءة –ادخل نت – اسمع موسيقى – اخرج مع صحابى


الاكلات المفضلة؟ 

الحلويات واولهم  الشيكولاتة

الصفات التى اخذتها عن والدك؟

واخدة منه كتير اوى لدرجة انى بحس  ان فى استنساخ

فى كل حاجة خدت منه عدم التسرع  واعرف اللى ادامى ازاى

و خدت طريقة تفكيره و ياريت ثقافته  بحس انه المفروض

انتهز كل ثانية عشان ابقى حاجة  ولو صغيرة منه




الصفات التى اخذتها عن والدتك؟

الطيبة – الحنان والامومة - عينيها- صوتها

– التضحية – النفس فى الاكل



اكتر 6 حاجات بتحبها ؟ 

اهلى- الصراحة- الهدوء –ضحكة طفل

-مسلسل friends- الاغانى القديمة



اكتر 6 حاجات بتكرها؟

الغباء-الكذب –النفاق – الخيانة – الغرور- نوال السعداوى



شخصيتك نوعها ايه؟

دمعتى قريبة جدا بالرغم انى بحب  اضحك جدا

شوية عصبية صغننة مع طيبة  ممم متقلبة شوية

من الاخر مرهفة الاحساس ههههههههه



لماذا دخلت عالم التدوين من الاساس؟

انا متابعة عالم التدوين من زمان ومتابعة  ناس دلوقتى بقوا اصحابى جدااااا

وعمرى ماتوقعت انى ادخل عالمهم  ولكنها لحظة جرأة

تحليت بها لاكون معهم  وبالفعل نجحت




اهمية التعليقات بالنسبة لك ؟ 

زى احساس اللى أمتحن ومستنى نتيجته



احلى بوست كتبته مع ذكر السبب؟

طبعا اللى بيحبها الناس بتسعدنى جدا ولكنى

احبهم جميعا فهم اولادى


افضل مدونة قرأتيها؟

بصراحة اكتر من حد ومش شرط فى مجال واحد مقدرش اقول واحدة بالتحديد

كل الريدر بتابعه بجد

بس لو هذكر مدونات فهقول مدونات بستمتع بغموض

بين سطورها يشدنى اليها

(خمسة جد- nostalagia- حلم لسه ما استسلمش- بحب الحكومة)

اهمية الانترنت بالنسبة لكى ؟

طبعا مهم جداااااااااا وبقى شىء اساسى

بالرغم من اننى اريد الابتعاد عنه

لكى اعيش حياتى بطريقة طبيعية  ولكنه كالسهل الممتنع


اهداء التاج ؟

طبعا هنهديه للى مخدهوش  وحبايبى كتير ماشاء الله

محمد- الروقان مع كوباية شاى

عمرو –خمسة جد

عمرو –مجلة عمرو وائل

Nostalagia

محمد-حلم لسه ما استسلمش

عمورة- ضحكات الحياة

ابو اللسعان كله- تخاريف مشكله

Michealito - عميدنا العثل وألبوناته

بحب الحكومة

طه-عاشق الجنة من الإخوان

شويه احاسيس

بسومتى حبيبتى – بسمة امل

نوارة حبيبتىىىىىىى


بس دول اللى حبيت ادبسهم بس طبعا اللى عايز التاج يتفضله

وكل سنة وانتم طيبين وعيد سعيد يارب عليكوا وتاكلو لحمة

وتلعبوا بالخروف مااااااء ماااااااااااااااء والعيدية عندى بالدولاررررررر

يلا ان شاء الله ماحد حوش خلى الناس تفرح

عرسى مع الليل

ها انا سأثور ثورتى سأصبح أول أمراة تقتلع قلبها من حشاياه لتخطو

بقدميها عليه فى فخر وغرور

سأجعل ضفائرى تتحرر من قيودها سأطلق سراحها

من قيود معذبة سأجعل شعرى ينتحر

وينطلق غجرى طويل يعبث فى الهواء كيفما

يشاء بلا نظام فى عبث وفوضى لاتزوج من قمرالليل

ها انا امرأة تفتك من داخلها عذرية الحب وترتدى

الثوب الحريرى الفضفاض

ثوبها الاسود الذى يدخل فى عراك مع النسيم

فيتسابقوا فى الجرى

وبعد الارهاق يعقدوا الهدنة

فأتلذذ بالنسيم يداعب ثوبى ويتراقصوا على جسدى

ويعزف عليه شتى الألحان

واشعر بالنسيم يتغلغل خصلات شعرى يلامس وجهى

ويعانقنى كالعشاق

فأنا عروسة قمر الليل

واراه ينتظرنى بلهفة



ها انا امرأة تتكحل بالسواد فترسم عيون كلها جرأة

كعيون عشيقها المفضل النمر

لتطلق من بين اهدابها السم الممزوج بالسحر

فانا أمرأة استطيع أن أقيد كل من يعاند رغبتى

أستطيع ان اهزمك واقاومك ايها الرجل

ها أنا امرأة تخضبت بدماء الوطاويط لتجعل من عالمها سحر خاااااص

امرأة ترقص ليلا بجنون وتتمايل على طبول الصقور
فتتحالف مع النجوم لتسرق ضوئها لتلمع عيناها



ها انا امرأة تزينت بالثعابين فجعلتها خلاخيل بأجراسها
وتحلت بها اساور لجسدها فتتمايل معها
وندخل فى رقصة طويلة ليلية

ها انا أمراة تضع السم على شفاها لتنتقم من كل من يحاول ان
يشتهى قبلتها ويتلمس شفاها

اصبحت امرأة تتحالف مع ملوك الجان لتدخل عالمهم الخفى
وتعرف اسرارهم
وتأخذ فنون السحر الاسود عنهم واصبحت استلذ بالغناء العذب

مع الذئاب ليلا فنشدوا المواويل

حتى ينبثق ضوء الشمس من رحم الفجر

سيكون كل ليلة لى عيد ويكون تزاوجى من الليل دوما

سأنثر تمائمى على ورق زهر البنفسج


وسأشرب نخب من يكاد ان يخوننى فدماءه

اعذب شراب لى فسأتذوقه بنشوة

وسأبدع لوحة فنية على جسده وسأتعلم فيه فنون النحت بأظافرى

انا أمرأة ادركت اننى اعيش فى غابة
فأغتسلت بماء المطر وتعطرت بالندى

وتعايشت كالحرباء على الاغصان فاتلون مثلها حتى لاصبح فريسة

سابقى قوية فاحببت قسوتى احببت تمردى الدائم وعشقت عنادى

ها انا امسك خنجر لاقتل ما بداخى الجنين الصغير المسمى الضعف

لانى لم اجد له اب فهو ليس له هويه سأقتله واتخلص من ذنبى

فسأتزوج من الليل واهنىء بين احضانه

وانهل من شفاه مايروى ظمأى وأغتسل بدماء من عشقنى و

التقيك ياليلي فى هدوء فالليلة عرسنا





______________________________________________________________________
ده اول بوست ليا بعد ما زاد عمرى عام اول مرة اقضى يوم مولدى تحت ظلال اغصان مدونتى وبين ورودها اتمنى ان تظل فواحة برحيق الورد دائما

مبرووووووووووووووووك لمصر

يااااااااااااااااه مفرحناش من زمان
تسلموا لينا يا ولاد مصر
النصر لمصر

محتاجة ابعد شوية والاقى نفسى